МАГИСТЕРСКИ ТРУД- ВИОЛЕТА МИХАЈЛОВСКА

Автор: Виолета Михајловска
Наслов: Влијанието на владината кампања за абортусот спроведена во периодот од 2009 до 2013 година врз населението од урбаните делови на Скопје
Година: 2018
Студиска програма: Родови студии

Апстракт

Предмет на овој магистерски труд е анализата на ефектите од владината кампања против абортусот, спроведувана во Република Македонија во периодот од 2009 до 2013 година, со посебен фокус на урбаното женско население во Скопје, конкретно во Општина Карпош. Трудот има за цел да испита како медиумските пораки и видеоспотовите од кампањата „Избери живот, имаш право на живот“ влијаеле врз перцепцијата на правото на абортус, правото на избор и репродуктивните права на жените.

Истражувањето се темели на интердисциплинарен пристап кој ги комбинира родовите студии, медиумските студии и социолошките методи, при што е применето квалитативно истражување преку фокус-групи. Теорискиот дел опфаќа анализа на абортусот низ филозофските, религиските и феминистичките дебати, како и компаративен преглед на законската регулатива за абортусот во земјите од регионот и во Македонија.

Резултатите од истражувањето покажуваат дека медиумите имаат значајна моќ да влијаат врз јавното мислење, особено кај помладата популација, но истовремено укажуваат дека кај поголемиот дел од испитаничките постои јасно формиран став во корист на правото на избор. Трудот заклучува дека политичкото и медиумското мешање во прашања кои директно се однесуваат на женското тело и репродуктивните права претставува сериозен проблем од аспект на родовата еднаквост и човековите права.