МАГИСТЕРСКИ ТРУД- ДАНИЕЛА АНТОНОВСКА

Автор: Даниела Антоновска
Наслов: Мобилизација на конзервативните сили против прогресивните родово еднакви политики во Централна и Источна Европа
Година: 2017
Студиска програма: Родови студии

Апстракт

Овој магистерски труд има за цел да даде преглед на неодамнешните напади врз родот и родовата еднаквост, како и врз други прогресивни прашања како што се брачната еднаквост, сексуалните и репродуктивните права и сексуалното образование, од страна на конзервативните сили во земјите од Централна и Источна Европа.

Како појдовна точка се земаат различни теориски пристапи кон родот, вклучително и концептот на родот како социјална конструкција и родот како перформативност. Истовремено, трудот нуди анализа на современите намерни погрешни интерпретации на родот, претставен како теорија на глобален заговор. Конзервативните сили, во соработка со Католичката црква, традиционалните интелектуалци и десничарските политички партии, ја конструираат т.н. „родова идеологија“ како реакција на меѓународното признавање на родовата еднаквост и човековите права.

Главната цел на овие актери е промена на општествената парадигма и наметнување на илибералната демократија како доминантен политички систем. Конзервативните движења настојуваат да допрат до најранливите категории граѓани од периодот на транзицијата, нудејќи алтернатива и наратив на заштита за „жртвите“ на глобализацијата. Во овој контекст, состојбата во Централна и Источна Европа се прикажува како борба за зачувување на националниот идентитет, националната економија и природниот поредок, при што Западна Европа, Брисел и Европската Унија се перципираат како колонизаторски и заговорнички сили.

Трудот отвора и прашање за можните стратегии на прогресивните сили во соочување со овој доминантен тренд, нагласувајќи ја потребата од застапување на позитивни социо-економски реформи, деполитизација на прашањата поврзани со човековите права и родовата еднаквост, како и самокритичка анализа на слабостите на левицата.

Истражувањето вклучува студии на случај од земјите во Централна и Источна Европа, со фокус на актуелните точки на напад и општествени предизвици. Методологијата се темели на анализа на структуриран квалитативен материјал (книги, текстови и статии), како и на феминистички феноменолошки и интерпретативен пристап, при што се вклучуваат и податоци добиени од индивидуалните искуства на учесниците во интервјуата и на самиот истражувач.