МАГИСТЕРСКИ ТРУД – АНЕТА СТЕФКОВСКА

Автор: Анета Стефковска
Наслов: Политичката култура и културната политика во Македонија и во регионот
Година: 2022
Студиска програма: Студии на политики

Апстракт

Овој магистерски труд се фокусира на анализата на политичката култура и културната политика во Македонија и во поширокиот регион, со цел да се испита нивното меѓусебно влијание врз функционирањето и стабилноста на политичкиот систем. Трудот тргнува од теориското разбирање на политичката култура како збир од вредности, ставови, уверувања и модели на политичко однесување што ја обликуваат интеракцијата помеѓу граѓаните, институциите и политичките елити.

Истражувањето опфаќа теориска анализа на поимот политичка култура, неговата историска еволуција и неговата улога во современите политички системи, како и разгледување на културната политика како инструмент за артикулација на националниот идентитет и јавниот интерес. Посебно внимание се посветува на односот помеѓу политичката елита и правилата на демократската игра, како и на прашањето за прифаќањето на националниот интерес над партиските и поединечните амбиции.

Преку компаративен пристап и анализа на релевантната литература, трудот укажува дека политичката култура претставува клучен фактор за разбирање на политичката стабилност, институционалната доверба и демократскиот капацитет на општествата во регионот. Заклучокот нагласува дека без развиена и инклузивна политичка култура, културните политики тешко можат да придонесат кон долгорочна демократизација и општествена кохезија.