МАГИСТЕРСКИ ТРУД- БИСЕРА БЕКЕР

Автор: Бисера Бекер
Наслов: Авангардата како катализатор на општествените промени
Година: 2018
Студиска програма: Родови студии

Апстракт

Целта на овој труд е да се испита феноменот на авангардата во уметноста, нејзиното настанување и развој, како и нејзината улога во трансформацијата на уметничките и општествените структури. Авангардните движења се анализираат како клучен предизвик за традиционалните институции на уметноста, но истовремено и како двигатели на нивна реартикулација и проширување. Посебен акцент се става на феминистичката авангарда како феномен инициран од жени и нивната потреба за подлабок дијалог со публиката за прашања кои историски биле маргинализирани или игнорирани.

Трудот ги разгледува револуционерните аспекти на авангардата во однос на начините на комуникација, употребените медиуми и интензитетот на нејзиното влијание врз публиката. Една од клучните цели е да се придонесе кон подлабоко и понијансирано разбирање на проблемите со кои жените и понатаму се соочуваат во патријархалните општества, особено во однос на нивната перцепирана улога и агенсност во општествените процеси.

Истражувањето се темели на претпоставката дека уметноста поседува потенцијал да ја трансформира реалноста преку артикулирање и видливост на одредени општествени феномени, како и преку отворање простор за критичко промислување на аномалиите на современото живеење.