МАГИСТЕРСКИ ТРУД – ВАЛЕНТИНА ТРПКОВСКА

Автор: Валентина Трпковска
Наслов: Фројдовата теорија за женската сексуалност и концептот на кастрација: феминистичка психоаналитичка критика
Година: 2016
Студиска програма: Родови студии

Апстракт

Овој магистерски труд нуди критичка анализа на Фројдовата теорија за женската сексуалност, со посебен фокус на концептот на кастрацијата и неговото централно место во психоаналитичкото објаснување на женскиот психосексуален развој. Трудот ја проблематизира претпоставката за сексуална хомогеност и машката норма како универзален модел врз кој се темели класичната психоанализа.

Преку теориска анализа на клучните текстови на Сигмунд Фројд, како и нивните подоцнежни интерпретации и критики кај автори како Жак Лакан, Жулиет Мичел и Лис Иригареј, истражувањето покажува дека женската сексуалност во психоанализата често се конципира како недостаток, празнина или отсуство во однос на машкиот субјект. Особено внимание се посветува на концептите на завист кон пенисот, кастрацијата и погледот, како механизми преку кои жената се позиционира како „кастриран“ и секундарен субјект.

Трудот аргументира дека ваквите теориски поставки не само што го редуцираат женското искуство, туку и придонесуваат кон репродукција на патријархалните структури на знаење и моќ. Преку феминистичка психоаналитичка перспектива, истражувањето укажува на потребата од преиспитување на основните поими на класичната психоанализа и отворање простор за поинакво теоретизирање на женската сексуалност надвор од логиката на недостатокот.