МАГИСТЕРСКИ ТРУД- ЗАКАРИ ДЕ ЈОНГ

Автор: Закари Де Јонг
Наслов: Преосмислување на oikos: кон посткапиталистичко разбирање на поделбата производство/репродукција
Година: 2022
Студиска програма: Магистерски студии по студии на политиките
Институција: Институт за општествени и хуманистички науки – Скопје
Ментор: проф. д-р Катерина Колозова

Апстракт

Темата на овој магистерски труд е насочена кон анализирање и дефинирање на клучните предуслови неопходни за конституирање на посткапиталистичко, односно комунистичко општество, преку радикално преосмислување на поимите oikos и oikonomia. Во современи услови, oikos како општествено-организациска целина и oikonomia како економска реалност се доминирани од законитостите на глобалниот капитализам и производството на вредност.

Трудот го третира oikos не само како домаќинство во тесна смисла, туку како целокупност од општествени и моќни односи што се репродуцираат на глобално ниво, додека oikonomia се анализира како вкупност на економските апарати што дејствуваат во рамките на таа целина. Наместо просторните или институционалните граници, фокусот е ставен врз самата форма на структурирање на капиталистичкото општество.

Преку критичка анализа на вредноста, апстракцијата и размената, трудот се движи кон концепција на „економија на реалното“, при што се проблематизираат експлоатацијата на трудот, патријархалната опресија и субјективно-центрираното мислење. Теориската рамка се потпира врз радикалниот материјализам и нефилозофијата, особено преку делата на Карл Маркс, Луј Алтисер, Жак Лакан, Квентин Мејасу и Катерина Колозова.

Во завршниот дел, трудот ја разгледува улогата на државата, нејзиното „одумирање“ и можностите за надминување на либералната демократија, со цел отворање простор за посткапиталистички форми на политичка и економска организација засновани врз материјалното и реалното, наместо врз апстрактната вредност.