МАГИСТЕРСКИ ТРУД – ЗОРИЦА НИКОЛОВА

Автор: Зорица Николова
Наслов: Сексуалното вознемирување како форма на родово базирано насилство врз цисродови и трансродови жени: застапеност, разлики и последици врз менталното здравје
Година: 2022
Студиска програма: Родови студии

Апстракт

Предмет на истражувањето во оваа магистерска теза е сексуалното вознемирување врз цисродови и трансродови жени, неговата застапеност како форма на родово базирано насилство, како и разликите во последиците што оваа форма на насилство ги остава врз менталното здравје кај двете категории жени. Сексуалното вознемирување се анализира како сериозна форма на дискриминација и повреда на човековите права, вклучително и правото на достоинство, слобода и заштита од нехуман и деградирачки третман.

Трудот ги разработува причините за појава на сексуалното насилство, различните форми на сексуално вознемирување, како и физичките, психолошките, социјалните и економските последици врз жртвите. Посебен фокус е ставен на последиците врз менталното здравје, вклучувајќи депресија, посттрауматско стресно растројство, чувство на вина и срам, како и нарушена самодоверба.

Истражувачкиот дел се темели на квантитативна и квалитативна анализа на податоци добиени преку спроведено емпириско истражување, при што се анализираат разликите меѓу цисродовите и трансродовите жени жртви на сексуално вознемирување. Трудот ја разгледува и законската рамка за сексуалното вознемирување во Република Северна Македонија и Европската Унија. Во заклучните согледувања се истакнува потребата од поефикасни институционални механизми за превенција, заштита и поддршка на жртвите, како и од понатамошни истражувања во оваа област.