МАГИСТЕРСКИ ТРУД – КАТЕРИНА ПЕПОВСКА

Автор: Катерина Пеповска
Наслов: Родови мејнстрим политики во науките: зголемување на учеството на жените во науките во Обединетите Нации и во Република Македонија
Година: 2017
Студиска програма: Родови студии

Апстракт

Живееме во свет на длабоки родови нееднаквости. Постојат земји и општества со речиси еднакво ниво на застапеност на мажите и жените во сите сфери на животот; општества во кои се работи на намалување на јазот во родовата застапеност на различни нивоа; како и општества кои воопшто не го разгледуваат прашањето на родовата асиметрија. Во општества со ниска свест за значењето на родовата еднаквост и без соодветно ниво на нејзина имплементација, активното и јасно присуство на застапниците за родова еднаквост е повеќе од неопходно доколку се стремиме кон подобрување на родовиот баланс.

Прашањата поврзани со родот се истражувани во бројни области и дисциплини, како и во интердисциплинарни полиња. Станува збор за сложена, повеќеслојна и чувствителна тема која ги опфаќа дефинирањето и секојдневното живеење на родово обележаните субјекти – мажи и жени. Целта на овој труд не е натамошно теориско продлабочување на прашањата поврзани со родот и родовиот идентитет, туку спроведување на применета истражувачка анализа.

Истражувањето е насочено кон застапеноста на жените во природните науки, поточно кон учеството на жените во STEMa дисциплините. Фокусот е ставен на политиките за родов мејнстриминг што ги спроведуваат Обединетите Нации со цел зголемување на вклученоста на жените-научнички. За да се обезбеди кохерентен преглед на политиките што се применуваат во повеќе институции со слични карактеристики, трудот ги анализира политиките на организациите, агенциите, фондовите, програмите и канцелариите на Обединетите Нации, обединети под поимот „систем на ОН“.

Дополнително, трудот ја анализира состојбата во природните науки во Република Македонија, особено изборот на идни професии кај деца од училишна возраст, со цел да се утврди до кој степен и зошто девојчињата одлучуваат или не одлучуваат да продолжат со студии во природните науки и да се насочат кон научна кариера. Трудот исто така нуди преглед на политики применувани во рамки на системот на ОН кои би можеле да се адаптираат и применат во Република Македонија со цел зголемување на бројот на жени во природните науки на национално ниво.

Предметот на истражување е комплексен и вклучува бројни фактори, актери и засегнати страни. За подобро разбирање на обемот на проблемот и анализа на родовите (не)рамнотежи во природните науки, презентиран е сеопфатен преглед на релевантната литература, вклучувајќи академски трудови, електронски извештаи, претходни истражувања, стратегии на организациите на Обединетите Нации и документи од македонските образовни институции. Меѓу авторите опфатени во трудот се: Anne Fausto-Sterling, Donna Haraway, Катерина Колозова, Ulrike Felt, Paul A. Sabatier, Anne Larason Schneider, Helen Ingram, Theodore Kohn, Silvia Federici и други.

Целта на прегледот на литературата е да се согледаат глобалните наоди, како и да се обезбеди соодветна „локализација“ при имплементацијата на одредени стратегии и политики на национално ниво. Предвидена е и квантитативна анализа преку презентирање на податоци за вработените во системот на Обединетите Нации по род, како и статистички податоци за студентите на македонските универзитети, со цел утврдување на фактичката состојба во однос на родовата (не)рамнотежа.

На крајот, презентирани се и резултатите од квалитативно истражување спроведено преку интервјуа со универзитетски студенти на возраст од 18 до 25 години, насочени кон нивните ставови, афинитети и разбирања за избраните студии, идните професионални можности и родовите односи во академскиот и професионалниот живот.